ميرپوماٿيلو(خبر چار نيوز)
گهوٽڪي ۾ 16 کان 22 ڊسمبر تائين پوليو مهم دوران 4 لک 70 هزار ٻارن کي ڦڙا پياريا ويندا
سمورا انتظام مڪمل، ڊپٽي ڪمشنر گهوٽڪي جي صدارت هيٺ اجلاس اسسٽنٽ ڪمشنرن ۽ ڊي ايڇ او سميت مختيارڪارن، ميڊيڪل آفيسرن توڙي لاڳاپيل کاتن جي عملدارن جي شرڪت. خبر موجب ڊپٽي ڪمشنر گهوٽڪي ڊاڪٽر سيد محمد علي جي صدارت هيٺ پوليو مهم بابت ڪيل انتظامن جو جائزو وٺڻ لاءِ سندس آفيس جي ڪاميٽي روم ۾ گڏجاڻي ٿي گذري. گڏجاڻي دوران ڊپٽي ڪمشنر ڳالهائيندي چيو ته پوليو وائرس خطرناڪ حد تائين پکڙجي چڪو آهي، خانپور مهر تعلقي ۾ ڪيس ظاهر ٿيڻ جو مطلب ضلعي گهوٽڪي ۾ به وائرس موجود آهي انڪري اسان سڀني کي چوڪس رهڻ جي ضرورت آهي ته جيئن ڪو به ٻار ڦڙن کان محروم نه رهي، هن چيو ته مهم دوران ضلعي جي هر هڪ ٻار کي پوليو وائرس کان بچاء جا ڦڙا پياريا وڃن. ان موقعي تي هن ڊي ايڇ او کي هدايت ڪندي چيو ته سمورن ورڪرن کي سهولتون فراهم ڪيون وڃن ته جيئن فيلڊ دوران کين ڪنهن به قسم جي مشڪل پيش نه اچي جڏهن ته مهم دوران لاپرواهي جو مظاهرو ڪندڙن خلاف ڪارروائي ڪئي وڃي. ان کان اڳ اين اسٽاپ آفيسر ڊاڪٽر ظهير ڊومڪي بريفنگ ڏيندي ٻڌايو ته 16 کان 22 ڊسمبر تائين جاري رهندڙ مهم دوران ضلعي جي 4 لک 77 هزار 972 ٻارن کي ڦڙا پياريا ويندا ان سلسلي ۾ سمورا انتظام مڪمل ڪيا ويا آهن. گڏجاڻي ۾ ڊبليو ايڇ او جي ڊاڪٽر نياز ۽ يونيسيف جي ڊاڪٽر رحيم گڏاڻي پڻ شرڪت ڪئي.
