ميرپور ماٿيلو: گھوٽڪي ضلعي ۾ بدامني خلاف سول سوسائٽي ۽ ٻين ڌرين پاران احتجاج
ميرپور ماٿيلو ۾ سول سوسائٽي ۽ مختلف ڌرين پاران گھوٽڪي ضلعي ۾ وڌندڙ بدامني خلاف ايس ايس پي آفيس آڏو احتجاج ڪري ڌرڻو هنيو ويو.
ان موقعي تي اڳواڻن علي حسن چڊڙ، جنيد جلباڻي،حنيف سومرو ۽ مولوي محمد علي گبول ميڊيا سان ڳالهائيندي چيو ته ضلعي جي مختلف شھرن ميرپور ماٿيلو، ڏھرڪي، گھوٽڪي، خانپور ۽ اٻاوڙو ۾ بدامني پنهنجي عروج تي پهچي وئي آهي. چوريون، ڌاڙا ۽ ڦرون روز جو معمول بڻجي چڪيون آهن.
اڳواڻن جو چوڻ هو ته موٽر سائيڪلن جي چوري، ڌاڙن ۽ اغوائن جون وارداتون وڌي رهيون آهن، جڏهن ته منشيات جو کلي عام وڪرو به جاري آهي. پوليس عوام جي تحفظ ۾ مڪمل ناڪام نظر اچي ٿي ۽ اگھور ننڊ ۾ ستل آهي.
احتجاج ڪندڙن جو چوڻ هو ته ڏينهن ڏٺي جو ماڻهن کان موٽر سائيڪلون ۽ موبائل فون ڦري رهيا آهن، ڳوٺن ۾ ماڻهن جا مال ۽ جان غير محفوظ بڻيل آهن. رات جي وقت هٿياربند چور گھرن ۾ گهڙي، ڌمڪيون ڏئي مال لٽي وڃن ٿا، پر پوليس اهڙين وارداتن کي روڪڻ ۾ مڪمل طور تي ناڪام ٿي چڪي آهي.
احتجاج ڪندڙن مطالبو ڪيو ته گھوٽڪي ضلعي ۾ هڪ ايماندار ۽ قابل آفيسر مقرر ڪيو وڃي ته جيئن عوام کي تحفظ فراهم ڪري سگهجي ۽ ماڻهو سک جو ساهه کڻي سگهن.
