صوبائي وزير زراعت سردار محمد بخش خان مهر چيو آهي ته ضلعي گهوٽڪي ۾ زرعي يونيورسٽي قائم ڪنداسون، پنجاب جا شاگرد به هتي پڙهڻ ايندا، عورتن کي ٽريڪٽر هلائڻ سيکاريون پيا، دنيا جديد ٿي وئي، زراعت ۾ به جديد ٽيڪنالاجي جي ضرورت آهي. اهڙن خيالن جو اظهار هن ڊي سي ڪمپليڪس ميرپور ماٿيلو ۾ هڪ روزه زرعي ميلي ۽ آن لائين هاري ڪارڊ رجسٽريشن پروگرام جو افتتاح ڪندي ڪيو. ان موقعي تي هن ڳالهائيندي چيو ته سنڌ صوبي جي هارين کي سهولت فراهم ڪرڻ لاءِ هاري ڪارڊ جي آن لائين رجسٽريشن شروع ڪئي وئي آهي ته جيئن هارين کي ڪنهن به زراعت يا روينيو آفيسر ڏانهن وڃڻ جي ضرورت نه پوي ۽ پاڻمرادو ويب سائيٽ يا موبائل ايپ ذريعي رجسٽريشن حاصل ڪري سگهي. هن چيو ته پ پ چيئرمين بلاول ڀٽو زرداري جي ويزن مطابق سنڌ جي هارين کي سهولتون فراهم ڪيون پيا، هاري ڪارڊ ذريعي کين زرعي مشينري، زرعي اوزارن، زرعي دوائن، ڀاڻ، قدرتي آفتن دوران سهولتون ۽ سبسڊي فراهم ڪئي ويندي، سنڌ حڪومت لاران 2022 جي برساتي ٻوڏ دوران لکين هارين کي تقريبن 18 ارب روپيا امداد طور فراهم ڪيا ويا. هن چيو ته موسمياتي تبديلين جي پيش نظر سرحد ۾ ريسرچ انسٽيٽيوٽ به قائم ڪيا ويا آهن جن ۾ ڪپهه ۽ ڪمند جي فصل تي تحقيق ٿيندي ۽ نيون جنسون تيار ڪيون وينديون ته جيئن هارين کي موسمياتي تبديلين مطابق آگاهي ۽ سکيا فراهم ڪري سگهجي، صوبائي وزير زراعت چيو ته سنڌ حڪومت پاران زراعت واري شعبي ۾ عورتن کي مضبوط بڻائڻ لاء کين ٽريڪٽر هلائڻ جي سکيا فراهم ڪئي پئي وڃي، اسان جو مقصد زرعي شعبي کي ترقي ڏيارڻ آهي ان سلسلي ۾ سنڌ حڪومت انقلابي قدم کڻي رهي آهي. صوبائي وزير زراعت سردار محمد بخس خان مهر اعلان ڪندي چيو ته ضلعي گهوٽڪي ۾ آئي بي اي يونيورسٽي قائم ڪرڻ بعد هاڻي زرعي يونيورسٽي به قائم ڪئي ويندي، مستقبل ۾ هتي پنجاب واسي شاگرد به پڙهڻ ايندا. تقريب ۾ سيڪريٽري زراعت سهيل احمد قريشي، ڊي سي گهوٽڪي ڊاڪٽر سيد محمد علي، ڊي جي ريسيرچ مظهر ڪيريو، ڊي جي نديم جماڻي، ايڊيشنل ڊي جي سيد امان ﷲ شاه، اڳوڻو صوبائي وزير عبدالباري خان پتافي، ڊائريڪٽر زراعت رسول بخش جوڻيجو سميت وڏي تعداد ۾ آبادگارن ۽ هارين شرڪت ڪئي
