ميرپورماٿيلو:ڪاليج ويندڙ شاگردياڻي جو پيڇو روڪڻ تي ڀاءُ تي فائرنگ، ڪيس داخل
خبر موجب ڪاليج ويندڙ نياڻي جو پيڇو ڪرڻ کان روڪڻ تي شاگردياڻي جي ڀاءُ مٿان فائرنگ ۽ موتمار ڌمڪيون ڏيڻ جو واقعو پيش آيو آهي. ميرپورماٿيلو پوليس ٿاڻي تي فهد حسين دايو جي فرياد تي جوابدار قيصر زمان عرف سڪندر پتافي ۽ ٻن اڻڄاتل ماڻهن خلاف ڪيس داخل ڪيو ويو آهي.
فريادي موجب، سندس ڀيڻ ڊگري ڪاليج ميرپورماٿيلو ۾ تعليم حاصل ڪري رهي آهي، جتي ڄاڻايل جوابدار سڪندر پتافي مسلسل سندس ڀيڻ جو پيڇو ڪندو هو. هن ٻڌايو ته جڏهن اسان هن عمل تي اعتراض ڪيو ۽ روڪڻ جي ڪوشش ڪئي ته جوابدار ۽ سندس ساٿين اسان کي موتمار ڌمڪيون ڏنيون ۽ اسان مٿان فائرنگ ڪئي پوليس جوابدارن خلاف ڪيس داخل ڪري جاچ شروع ڪري ڇڏي آهي. متاثر خاندان انصاف لاءِ اعليٰ اختيارين کان اپيل ڪئي آهي ته جوابدارن کي قانون جي ڪٽهڙي ۾ آندو وڃي ۽ تحفظ فراهم ڪيو وڃي.
