گهوٽڪي (خبر چار نيوز ) سنڌ حڪومت جي اعلان موجب سرڪٽ هائوس گهوٽڪي جي عمارت آئي بي اي يونيورسٽي سکر حوالي ڪئي وئي، اسسٽنٽ ڪمشنر گهوٽڪي امر شاڪر ججه آئي بي اي يونيورسٽي سکر جي رجسٽرار اظهار سومرو کي عمارت جا دستاويز فراهم ڪيا. خبر موجب سنڌ حڪومت جي اعلان تي عمل ڪندي ڊپٽي ڪمشنر گهوٽڪي ڊاڪٽر سيد محمد علي جي هدايتن تي سرڪٽ هائوس گهوٽڪي جي عمارت آئي بي اي يونيورسٽي سکر حوالي ڪئي وئي، ان سلسلي ۾ سرڪٽ هائوس گهوٽڪي ۾ هڪ مختصر تقريب ٿي گذري جنهن ۾ اسسٽنٽ ڪمشنر گهوٽڪي امر شاڪر ججه، رجسٽرار آئي بي اي يونيورسٽي سکر اظهار سومرو، پراجيڪٽ ڊائريڪٽر عبيدﷲ سومرو، ايگزيڪيوٽو انجنيئر رفيق احمد ڪلهوڙو، پرنسيپال آئي بي پبلڪ اسڪول گهوٽڪي ظهور احمد چاچڙ، ٽي اي او سيد عبدالجبار شاه سميت سماجي اڳواڻن ۽ شهرين شرڪت ڪئي. ان موقعي تي اسسٽنٽ ڪمشنر گهوٽڪي ڳالهائيندي چيو ته سنڌ حڪومت جي اعلان موجب سرڪٽ هائوس جي عمارت آئي بي اي سکر حوالي ڪئي وئي آهي جتي ڪجهه مهينن دوران تدريسي عمل شروع ٿي ويندو جنهن سان هتان جي مقامي شاگردن کي فائدو ٿيندو ۽ مستقبل ۾ روزگار جا موقعا به پئدا ٿيندا. ان موقعي تي رجسٽرار آئي بي اي يونيورسٽي سکر اظهار سومرو ڳالهائيندي چيو ته سنڌ حڪومت جي اها وڏي ڪاوش آهي جنهن اسان کي سرڪٽ هائوس جي عمارت فراهم ڪري گهوٽڪي ۾ ڪئمپس کولڻ جو موقعو ڏنو، اسين سرڪٽ هائوس کي اهڙي ڪئمپس بڻائينداسون جيڪا سکر آئي بي اي جهڙي هوندي، هن اداري ۾ سنڌ حڪومت جي تعاون سان بهترين پروگرام شروع ڪيا ويندا…
