ميرپور ماٿيلو(رپورٽ عمر ڪورائي )
صوبائي وزير زراعت، اسپورٽس اينڊ اينٽي ڪرپشن سنڌ سردار محمد بخش خان مهر چيو آهي ته سنڌ حڪومت صوبي ۾ راندين کي فروغ ڏيڻ لاءِ ڪم ڪري پئي، اسان چاهيون ٿا ته سنڌ جي نوجوانن کي راندين جا موقعا فراهم ڪريون ان سسلسلي ۾ اسپورٽس کاتو سرگرم آهي، ڪيڊٽ ڪاليج گهوٽڪي پاران اسپورٽس ويڪ منعقد ڪرڻ هڪ سٺو قدم آهي اهڙن پروگرامن جي حوصلا افزائي ڪريون ٿا. اهڙن خيالن جو اظهار هن بطور مهمان خاص ڪيڊٽ ڪاليج گهوٽڪي ۾ ساليانو اينيوئل اسپورٽس ويڪ جو افتتاح ڪندي ڪيو. اسپورٽس ويڪ جي رنگا رنگ افتتاحي تقريب ۾ ڊپٽي ڪمشنر گهوٽڪي ڊاڪٽر سيد محمد علي، پرنسیپال ڪيڊٽ ڪاليج برگيڊيئر ايمل خان، اسسٽنٽ ڪمشنر گهوٽڪي امر ججه ۽ اسسٽنٽ ڪمشنر ميرپور ماٿيلو بابر علي سميت ڪاليج جي استادن ۽ شاگردن وڏي تعداد ۾ شرڪت ڪئي. ان موقعي تي صوبائي وزير خطاب ڪندي چيو ته نصابي سرگرمين سان گڏوگڏ نوجوانن جي جسماني ۽ ذهني نشونما لاءِ راندين جون سرگرميون به لازمي آهن جنهن سان سندن خود اعتمادي ۾ اضافو ٿئي ٿو انڪري شاگردن کي گهرجي ته هو راندين جي مقابلن ۾ حصو وٺي پنهنجو پاڻ کي چست رکن ته جيئن مستقبل ۾ هر قسم جي مقابلي لاءِ تيار رهن. هن چيو ته ڪيڊٽ ڪاليج جو بهترين انفرااسٽرڪچر ڏسي خوشي محسوس ٿئي پئي، دل چاهي پئي ته ميدان ۾ لهي نوجوانن سان ڊوڙ جو مقابلو ڪريان، هن اداري ۾ اسان جي خاندان جون خدمتون شامل آهن، ڪاليج پاران اسپورٽس ويڪ منعقد ڪرڻ هڪ بهتر قدم آهي، مستقبل ۾ به اهڙا پروگرام منعقد ٿيڻ گهرجن ان سلسلي ۾ اسپورٽس کاتو مڪمل تعاون فراهم ڪندو ان موقعي تي پرنسيپال ڪيڊٽ ڪاليج صوبائي وزير کي شيلڊ پڻ ڏني. بعد ۾ صوبائي وزير سردار محمد بخش خان مهر ڊپٽي ڪمشنر گهوٽڪي کي ساڻ ڪري جھانپور کان نئون روڊ تعمير ٿيندڙ روڊ، ماٿيلو مومل جي ماڙي روڊ، ڳڙهي چاڪر کان جروار روڊ سميت روڊن جي 13 اسڪيمن جو افتتاح ڪيو. ان موقعي تي هن ڳالهائيندي چيو ته سنڌ حڪومت عوام جي فلاح ۽ بهبود لاءِ ڪم ڪري پئي، ماڻهن کي سهولتون فراهم ڪرڻ لاءِ وڌ کان وڌ ترقياتي اسڪيمون ڏئي رهيا آهيون ته جيئن سندن مشڪلاتن کي گهٽ ڪري سگهجي. ان موقعي تي هن ايگزيڪيوٽو انجنيئر روڊس کي هدايت ڪندي چيو ته ترقياتي اسڪيمن جي معيار کي يقيني بڻائي وقت سر مڪمل ڪيون وڃن، ناقص مٽيريل استعمال ڪيو ويو ته سخت ڪارروائي ٿيندي
