اسلام آباد: پي ٽي آءِ جي باني عمران خان تصديق ڪئي آهي ته پارٽي چيئرمين بيرسٽر گوهر آرمي چيف سان پشاور ۾ ملاقات ڪئي آهي.
اڊيالا جيل جي عدالت جي ڪمري ۾، عمران خان صحافين سان غير رسمي ڳالهه ٻولهه ڪئي، جنهن دوران صحافين کانئس بيرسٽر گوهر ۽ آرمي چيف جي ملاقات بابت پڇيو. پهريان هن ٿورو ڇڪتاڻ جو اظهار ڪندي چيو ته “مون کي تفصيل معلوم نه آهن”.
تنهن هوندي، بعد ۾ عمران خان بيرسٽر گوهر جي ملاقات جي تصديق ڪندي چيو ته، “آرمي چيف سان ملاقات خوش آئند ڳالهه آهي. جيڪڏهن ڪا ڳالهه ٻولهه شروع ٿي آهي ته اهو پاڪستان لاءِ سٺو آهي. اسان چاهيون پيا ته ڳالهين جو عمل شروع ٿئي، جنهن سان ملڪ جي استحڪام جي ڳالهه ٿيندي.”
عمران خان وڌيڪ چيو، “اسٽيبلشمينٽ کي اسان سان ڳالهائڻ گهرجي. مون ڪڏهن به ناهي چيو ته ڳالهين جا در بند آهن، مون سدائين ڳالهه ٻولهه جي ڳالهه ڪئي آهي. ٻي پاسي کان دروازا بند هئا، پر هاڻي جيڪڏهن ڳالهه ٻولهه شروع ٿي آهي ته اها پاڪستان جي استحڪام لاءِ هوندي.”
بيرسٽر گوهر جي تصديق
ٻئي طرف، بيرسٽر گوهر پڻ تصديق ڪندي چيو ته منهنجي ۽ علي امين گنڊاپور جي آرمي چيف سان الڳ ملاقات ٿي. آرمي چيف آڏو پي ٽي آءِ جا سڀ معاملا ۽ مطالبا پيش ڪيا آهن.
هن چيو، “آرمي چيف سان ملاقات ۾ ملڪي استحڪام بابت سڀني معاملن تي ڳالهه ٻولهه ٿي. ٻي پاسي کان مثبت جواب مليو آهي. اسٽيبلشمينٽ سان سڌي ڳالهه ٻولهه خوش آئند آهي ۽ اميد آهي ته هاڻي حالتون بهتر ٿي وينديون.”
واضح رهي ته چيئرمين پي ٽي آءِ گذريل ڏينهن آرمي چيف سان ملاقات جي ترديد ڪئي هئي.
