سنڌ پوليس جي آر آر ايف سکر جي جوانن سان ناانصافي، سخت ڊيوٽي باوجود ڏهاڙي پنج هزار روپيه ڪٽڻ جو حڪم
سکر: سنڌ پوليس جي اسپيشل ڊپارٽمينٽ آر آر ايف (ريپڊ ريسپانس فورس) سکر ۾ ڊيوٽي سرانجام ڏيندڙ جوانن سان غيرانساني سلوڪ سامهون آيو آهي، جتي سخت ترين حالتن ۾ نوڪريون ڪندڙ سپاهين جي ڪا به عزت نه ٿي ڪئي وڃي. ايس ايس پي آر آر ايف سکر طرفان جوانن جي موڪلن بابت هڪ ظالماڻو حڪم جاري ڪيو ويو آهي، جنهن موجب ايمرجنسي جي صورت ۾ هڪ يا ٻن ڏينهن جي موڪل ڪرڻ تي پوري سال جي غير حاضري ڪائونٽ ڪئي پئي وڃي. ان سان گڏوگڏ هر غير حاضري تي ڏهاڙي پنج هزار روپيه ڪٽڻ جا حڪم پڻ جاري ڪيا ويا آهن.آر آر ايف ۾ ڪم ڪندڙ سپاهي چون ٿا ته اهي ڪچي جي خطرناڪ علائقن ۾ پنهنجي حياتي خطري ۾ وجهي نوڪري ڪن ٿا. انهن علائقن ۾ ڏوهارين سان مقابلو ڪرڻ ۽ عوام جي حفاظت کي يقيني بڻائڻ لاءِ جوان ڏينهن رات محنت ڪن ٿا. ان جي باوجود، جيڪڏهن ڪنهن ايمرجنسي سبب هڪ يا ٻه ڏينهن جي موڪل گهرجي ته ان کي غير حاضري قرار ڏئي سندن پگهار مان ڏهاڙي پنج هزار روپيه ڪٽڻ ظلم جي برابر آهي.سپاهين جو چوڻ آهي ته سندن مهيني پگهار رڳو 50 هزار روپيه آهي، جيڪا اڳ ۾ ئي ڪافي گهٽ آهي. ان مان ڏهاڙي پنج هزار روپيه ڪٽڻ سان سندن مالي حالتون تمام گهڻيون خراب ٿي ويون آهن. ڪيترن ئي سپاهين کي گهر جي خرچن ۽ ٻارن جي تعليم ۾ مشڪلاتون پيش اچي رهيون آهن
اهڙي فيصلي کي انساني حقن جي ڀڃڪڙي قرار ڏيندي، سپاهين اعليٰ اختيارين کان اپيل ڪئي آهي ته ان ناانصافي جو نوٽيس وٺي ايس ايس پي آر آر ايف سکر جي اهڙن فيصلن کي ختم ڪيو وڃي. سپاهين مطالبو ڪيو آهي ته سندن جائز مسئلن کي سمجهي، کين عزت ۽ سهولتون مهيا ڪيون وڃن. هن مطالبو ڪيو ته غير حاضري جي ڪائونٽنگ بابت قانون کي نظر ثاني ڪيو وڃي. ڏهاڙي پنج هزار روپيه جي ڪٽوتي کي فوري طور ختم ڪيو وڃي.سپاهين جي سخت ڊيوٽين جي عيوض سهولتون ۽ بونس ڏنا وڃن. آر آر ايف ۾ ڪم ڪندڙ سپاهين جي مالي حالتن کي بهتر بڻائڻ لاءِ خاص پيڪيج جو اعلان ڪيو وڃي.
هن وقت تائين سنڌ پوليس يا لاڳاپيل اختيارين طرفان هن معاملي تي ڪا به وضاحت يا بيان جاري نه ڪيو ويو آهي. عوام ۽ سپاهين اميد ڪري رهيا آهن ته اعليٰ اختيارين جلد ان معاملي جو نوٽيس وٺي مظلوم سپاهين کي انصاف مهيا ڪندا.
